எழுத மறந்த டைரி குறிப்புகள்

தினம் வாங்கிய திட்டு
கடலை மிட்டாய் கணக்கு
பக்கத்து வீட்டு வனிதாவுடன்
ஓடிப் பிடித்த விளையாட்டு
வெற்றி பட்டியல்
எனத் தொடங்கிய
குழந்தைப் பருவ டைரி குறிப்புகள்

பார்த்த படங்களின் விமர்சனங்கள்
மனம் கவர்ந்த மங்கையரின்
ரகசிய பெயர் குறிப்புகள்
என விடலை பருவம் அடைந்து

கல்லூரி லேப்பில்
இரவல் பென்சில் வாங்க
என்னை அவள் அணுகிய
தருணம் தொடங்கிய
காதல் கவிதை தொகுப்பு
என வாலிபம் பெற

பின்னாளில்
சலவைக் குறிப்பு கூட
எழுத மறந்த மௌனம்
உண்மையின் உபத்திரவத்திற்கு பயந்து
ஒரு நல்ல நண்பனுக்கு
நான் இழைத்த
துரோகம்!

டைரியில்
எழுத மறந்த குறிப்புகள்
நான் ரசிக்க மறந்த
நாட்களின் தொடக்கங்கள்..